اس سورت کے آغاز میں اللہ تعالیٰ کی قدرت کاملہ کے دلائل بیان کیے گئے ہیں۔ اللہ تعالیٰ نے آسمان کو بغیر ستونوں کے کھڑا کیا۔ سورج اور چاند انسان کے لیے مسخر کر دیے۔ زمین کو بچھونا بنایا، اس کے اندر پہاڑوں اور نہروں کا حسین امتزاج رکھا۔ ہر چیز کا جوڑا جوڑا بنایا، ایک ہی زمین اور ایک ہی طرح کے پانی کے باوجود ہر درخت کا پھل، ذائقہ اور تاثیر جدا جدا بنائی۔

انسانوں کو نصیحت کی گئی ہے کہ اس کائنات میں غور و فکر کریں اور اللہ کی طرف رجوع کریں۔

اس سورت میں اللہ تعالیٰ کے کامل علم کا بیان دیا گیا ہے۔ ہر چیز کا علم صرف اللہ کے پاس ہے۔ وہ ہر باطن اور ظاہر کو جاننے والا ہے۔ تم کوئی بات چھپاؤ یا ظاہر کرو سب اس کے علم میں ہے۔

اللہ تعالیٰ نے ہر انسان کے آگے اور پیچھے پہرے دار مقرر کیے ہیں جو اللہ کے حکم سے انسانوں کی حفاظت کرتے ہیں۔ ان فرشتوں کو مُعَقِّبَاتٌ کہا گیا ہے۔ نبی کریم ﷺ نے فرمایا "فرشتے آگے اور پیچھے زمین پر آتے جاتے رہتے ہیں، کچھ فرشتے رات کے ہیں اور کچھ دن کے اور یہ سب فجر اور عصر کی نماز میں جمع ہو جاتے ہیں۔

1): یہ لوگ نصیحت حاصل کرتے ہیں۔ 2): وعدہ پورا کرتے ہیں۔ 3): صلہ رحمی کرتے ہیں۔ 4): خوف الٰہی رکھتے ہیں۔ 5): آخرت کے عذاب سے ڈرتے ہیں۔ 6): صبر کرتے ہیں۔ 7): نماز قائم کرتے ہیں۔ 8): انفاق فی سبیل اللہ یعنی اللہ تعالیٰ کے راستے میں خرچ کرتے ہیں۔ 9): نیکی کی اتباع کرتے ہیں۔

اہل ایمان کے لیے آخرت کا دن سکون و راحت کا دن ہو گا۔ ان کے لیے جنت کے باغات ہیں۔ ان کو جنت میں فرشتوں کی طرف سے سلامی پیش کی جائے گی۔ اور وہ اس میں ہمیشہ ہمیشہ رہیں گے۔

اہل ایمان کے لیے اللہ کے ذکر کی اہمیت و فضیلت کا بیان کیا گیا ہے کہ اللہ تعالیٰ کے ذکر میں دلوں کا سکون اور چین ہے۔

اس سورت کے آخری حصہ میں نبی کریم ﷺ کو تسلی دی ہے کہ آپ سے پہلے بھی رسولوں کو جھٹلایا گیا اور جھٹلانے والوں کا انجام بہت برا ہوا۔ اے نبی آپ سے پہلے بھی منافقین نے انبیاء کرامؑ کے ساتھ مکر و فریب کیا۔ آپ ﷺ واضح کر دیں کہ تمام تدابیر صرف اللہ کے پاس ہیں اور کفار عنقریب اپنے بُرے انجام کو پہنچ جائیں گے۔ آپ ﷺ اعلان کر دیں کہ میں اللہ کی عبادت کرتا ہوں، اس کے ساتھ کسی کو شریک نہیں ٹھہراتا، میں اسی کو پکارتا ہوں، اسی کی طرف لوٹ کر جانا ہے۔ قرآن مجید کو ہم نے نازل کیا اور آپ ﷺ اس کی اتباع کریں۔

اس سورت میں مشرکین کے اعتراضات کا جواب دیا ہے اور ان شبہات کو رفع کیا ہے جو حضرت محمد ﷺ کے بارے میں ان لوگوں کے دلوں میں پائے جاتے تھے یا مخالفین کی طرف سے ڈالے جاتے تھے۔ اللہ تعالیٰ نے ان کا جواب دیتے ہوئے فرمایا کہ ہم نے جتنے بھی رسول بھیجے ہیں وہ شادیاں کرتے تھے اور صاحب اولاد تھے۔ یہ ساری باتیں علم الٰہی میں محفوظ ہیں اور لوحِ محفوظ پر جس چیز کو اللہ چاہتا ہے ثابت رکھتا ہے اور جس کو چاہتا ہے مٹا دیتا ہے۔