سورۃ الْمَآئِدَة

ایفائے عہد کی تلقین: سورۃ المائدہ کے آغاز میں اللہ تبارک و تعالیٰ نے اہل ایمان کو معاہدے پورا کرنے کی تاکید کی ہے۔

حرام اشیاء سے متعلق احکامات: اللہ تبارک و تعالیٰ نے اس سورت میں مردار خون، خنزیر کا گوشت اور جس جانور پر ذبح کے وقت غیر اللہ کا نام پکارا جائے اس کو حرام قرار دیا ہے۔ اسی طرح وہ جانور بھی حرام ٹھہرایا جائے گا جو گلا گھٹنے، چوٹ لگنے، کسی دوسرے جانور کا سینگ لگنے سے گر کر مر جائے یا وہ جانور جسے کوئی درندہ کھا لے، البتہ انہیں اگر پہلے ذبح کر لیا جائے تو ایسے جانوروں کا گوشت کھانا حلال ہوگا۔ بتوں کی قربان گاہ میں ذبح کیے جانے والے جانوروں کو بھی حرام قرار دیا گیا ہے۔

اسلامی شریعت کا بنیادی اصول: حلال و حرام کی تفصیلات کا ذکر کرنے کے بعد ایک بنیادی اصول یہ بیان کیا گیا کہ وہ تمام چیزیں پاکیزہ اور حلال ہیں جن کو اسلامی شریعت نے حرام نہیں ٹھہرایا ہے۔

یہودی کا واقعہ: ایک یہودی نے حضرت عمر فاروق رضی اللہ تعالیٰ عنہ سے کہا کہ آپ اپنی کتاب میں ایک ایسی آیت پڑھتے ہیں۔ اگر وہ آیت ہم یہودیوں کی کتاب میں نازل ہوئی ہوتی تو ہم اس کے نزول کے دن کو عید کا دن بنا لیتے۔ آپ رضی اللہ تعالیٰ عنہ نے فرمایا کون سی آیت؟ اس نے کہا کہ سورۃ المائدہ کی آیت نمبر تین ترجمہ “آج کے دن میں نے تمہارے لیے تمہارا دین مکمل کر دیا اور تم پر اپنی نعمت پوری کر دی اور تمہارے لیے اسلام بطور دین پسند کر لیا” یہ سن کر حضرت عمر فاروق رضی اللہ تعالیٰ عنہ نے فرمایا ہم اس دن اور جگہ کو جانتے ہیں جب یہ آیت رسول کریم صلی اللہ علیہ وسلم پر نازل ہوئی یہ عرفہ کا دن تھا اور یہ مسلمانوں کے قریب عید کا دن ہی ہے۔

عظیم دن: یوم عرفہ مسلمانوں کے لیے ایک عظیم دن ہے۔ اس دن دین کی تکمیل ہوئی اور مسلمان اس دن عید مناتے ہیں۔

طہارت سے متعلق احکامات: اللہ رب العزت نے اس سورت میں طہارت سے متعلق وضو، غسل اور تیمم کے احکامات کا ذکر کیا گیا ہے۔

عدل و انصاف کا حکم: اللہ تبارک و تعالیٰ نے مسلمانوں کو تلقین کی ہے کہ وہ ہر حال میں عدل و انصاف سے کام لیں اور کسی قوم کی دشمنی بھی انہیں ناانصافی پر آمادہ نہ کرے۔

عمل صالح پر اجر: اس سورت میں اللہ رب العزت نے عمل صالح اختیار کرنے والوں اور اللہ تعالیٰ پر ایمان رکھنے والوں کے لیے مغفرت اور اجر عظیم کا وعدہ کیا ہے۔

کافروں کو دوزخ کی وعید: جن لوگوں نے کفر کیا اور اللہ تبارک و تعالیٰ کی قرآن مجید کی آیات بینات کو جھٹلایا تو ان کے لیے دوزخ کی وعید ہے۔

بنی اسرائیل کا تذکرہ: اللہ رب العزت نے بنی اسرائیل کے برے اعمال کا تذکرہ کرتے ہوئے فرمایا کہ انہوں نے اللہ رب العزت سے کیے ہوئے عہد کو توڑا کتاب اللہ میں تحریف کی۔ انبیاء کرام علیہم السلام اور اللہ تبارک و تعالیٰ کی نافرمانی کا ارتکاب کیا۔

یہودیوں پر لعنت: برے اعمال کی وجہ سے اللہ رب العزت نے یہودیوں پر لعنت فرمائی اور ان کے دلوں کو سخت کر دیا۔

مسیحیوں کے احوال: یہودیوں کے بعد عیسائیوں کے احوال کا تذکرہ ہوا ہے کہ انہوں نے بھی اللہ تعالیٰ سے کیے ہوئے عہد کو فراموش کیا۔ حضرت عیسیٰ علیہ السلام کو خدا کا بیٹا قرار دیا۔ وہ خود کو اللہ تعالیٰ کے بیٹے اور محبوب قرار دیتے تھے۔ اللہ تعالیٰ نے مسلمانوں کو اس طرح کے اعمال سے بچنے اور دین میں غلو سے گریز کرنے کی تلقین فرمائی ہے۔ ارشاد باری تعالیٰ ہے “اور ان لوگوں سے جنہوں نے کہا بے شک ہم نصاریٰ ہیں ہم نے ان سے بھی بہتر پختہ عہد لیا تو انہوں نے اس میں سے ایک بڑا حصہ بھلا دیا جس بات کی انہیں نصیحت کی گئی تھی تو ہم نے ان کے درمیان روز قیامت تک دشمنی اور بغض ڈال دیا اور عنقریب اللہ انہیں بتا دے گا جو کچھ وہ کرتے ہیں” (المائدہ 14 آیت)

حضرت آدم علیہ السلام کے بیٹوں کی قربانی کا قصہ: سورۃ المائدہ میں حضرت آدم علیہ السلام کے دو بیٹوں کی قربانی کا قصہ ذکر کرتے ہوئے یہ تعلیم دی گئی ہے کہ اللہ تعالیٰ متقین کی قربانی قبول کرتا ہے۔ اس قصے کے تناظر میں یہ قانون بھی ذکر فرمایا گیا ہے کہ جس نے کسی ایک انسان کو ناحق قتل کیا گویا اس نے ساری انسانیت کو قتل کیا اور جس نے کسی ایک انسان کی جان بچائی گویا اس نے ساری انسانیت کی جان بچائی۔ ارشاد باری تعالیٰ ہے “اور آپ صلی اللہ علیہ وسلم ان لوگوں کو آدم علیہ السلام کے دونوں بیٹوں کا قصہ صحیح طور پر پڑھ کر سنا دیجیے جب ان دونوں نے قربانی پیش کی تو دونوں میں سے ایک ہابیل کی طرف سے قبول کی گئی اور دوسرے قابیل کی طرف سے قبول نہیں کی گئی قابیل نے کہا میں ضرور تجھے قتل کروں گا ہابیل نے کہا بے شک اللہ پرہیزگاروں کی طرف سے قبول فرماتا ہے”۔ (المائدہ 27 آیت)

سزاؤں کا بیان: اس سورت میں ڈاکہ زنی اور چوری کی سزا کو بیان کیا گیا ہے۔ اس سورت میں بغاوت، فساد، ڈاکہ زنی اور چوری کی سزاؤں کا بیان بھی ہے۔ ڈاکہ زنی کی سزا یہ ہے کہ اس کا ارتکاب کرنے والوں کو قتل کر دیا جائے، سولی چڑھا دیا جائے، ان کے ہاتھ پاؤں کاٹ دیے جائیں یا ان کو جلا وطن کر دیا جائے۔ جبکہ چوری کی سزا یہ ہے کہ چور کا ہاتھ کاٹ دیا جائے۔ یہ سزائیں اس لیے مقرر کی گئی ہیں کہ انسان ان سے عبرت حاصل کرے اور معاشرہ جرم سے پاک ہو جائے۔

قسم کے کفارہ کا بیان: قسم کے تین کفارہ کو بیان کیا گیا ہے۔ قسم کے کفارہ کے بیان میں ہے کہ دس مسکینوں کو کھانا کھلانا، ایک غلام کو آزاد کرنا یا تین روزے رکھنا ہے۔

تکمیل دین کا تذکرہ: تمام انبیاء کرام علیہم السلام کا دین ایک ہی ہے۔ لیکن اپنے اپنے وقت کے اعتبار سے ہر امت کے لیے معاشرتی احکام مختلف رہے ہیں۔ نبی کریم صلی اللہ علیہ وسلم پر دین کی تکمیل کر دی گئی ہے۔ اور دین اسلام ہر اعتبار سے مکمل اور قیامت تک کے لیے قابل عمل ہے۔ ارشاد باری تعالیٰ ہے ترجمہ “آج کے دن میں نے تمہارے لیے تمہارا دین مکمل کر دیا اور تم پر اپنی نعمت پوری کر دی اور تمہارے لیے اسلام بطور دین پسند کیا ہے”۔ (المائدہ 3 آیت)

حق پرست اہل کتاب کا تذکرہ: سورۃ المائدہ میں اللہ تعالیٰ نے حق پرست اہل کتاب کا ذکر فرمایا ہے کہ جب انہوں نے رسول اللہ صلی اللہ علیہ وسلم پر نازل ہونے والی کتاب کی آیات کو سنا تو ان کے دل نرم ہو گئے۔ وہ گریہ و زاری کرنے لگے اور حق کی شہادت دیتے ہوئے ایمان لے آئے۔ اللہ تعالیٰ نے ان کے اس رویے کی تعریف کرتے ہوئے انہیں جنت کا حقدار ٹھہرایا ہے۔ ارشاد باری تعالیٰ ہے ترجمہ “اور جب وہ اس قرآن کو سنتے ہیں جو رسول صلی اللہ علیہ وسلم کی طرف نازل کیا گیا ہے تو آپ دیکھتے ہیں کہ ان کی آنکھیں آنسوؤں سے بہہ رہی ہوتی ہیں۔ اس لیے کہ وہ حق کی پہچان کر چکے ہیں۔ وہ عرض کرتے ہیں کہ اے ہمارے رب ہم ایمان لے آئے پس ہمیں حق کے گواہوں کے ساتھ لکھ لے”۔

انکار ایمان پر وعید: جن لوگوں نے ایمان لانے سے انکار کیا انہیں جہنم کی وعید بھی سنائی گئی ہے ارشاد باری تعالیٰ ہے ترجمہ “اور جنہوں نے کفر کیا اور ہماری آیتوں کو جھٹلایا یہی لوگ جہنم والے ہیں”۔

یہودیوں اور عیسائیوں کو نصیحت: اس سورت میں یہودیوں کو ان کے غلط رویے پر متنبہ کیا گیا ہے اور انہیں راہ راست پر آنے کی دعوت دی گئی ہے۔ اس کے ساتھ ساتھ عیسائیوں کو ان کے غلط عقائد کے بارے میں بتایا گیا ہے اور انہیں نبی کریم صلی اللہ علیہ وسلم پر ایمان لانے کی دعوت دی گئی ہے۔