سُورَةُ الْبَقَرَة

تعارف

خصوصیات: سورۃ البقرۃ قرآن مجید کی سب سے لمبی سورت ہے۔ یہ مدینہ منورہ میں نازل ہونے والی پہلی سورت ہے۔ اس سورت میں سب سے زیادہ احکامات ربی کا ذکر ہے۔ یہ سورتوں کی ترتیب کے لحاظ سے دوسری سورت ہے۔ اس سورت کا زیادہ تر حصہ ہجرت مدینہ کے بعد بالکل ابتدائی دور میں نازل ہوا تھا۔

حروف مقطعات: سورۃ البقرۃ حروف مقطعات میں سے الٓمّٓۚ سے شروع ہوتی ہے۔ (حروف مقطعات سے مراد ایسے حروف ہیں جن کے معانی اللہ رب العزت اور نبی حضرت محمد ﷺ کے علاوہ کوئی نہیں جانتا)

وجہ تسمیہ: سورۃ البقرۃ کی آیت نمبر سڑسٹھ (67) سے لے کر آیت نمبر (73) تہتر تک ایک گائے کا واقعہ بیان ہوا ہے جسے بنی اسرائیل کو ذبح کرنے کا حکم دیا گیا تھا۔ عربی زبان میں "گائے" کو بقرۃ کہتے ہیں۔ اسی مناسبت سے اس سورت کا نام سورۃ البقرۃ رکھا گیا ہے۔

واقعہ کی حکمتیں: اس واقعہ سے بہت سی حکمتوں کا پتہ چلتا ہے جن میں سے ایک یہ کہ اللہ سبحانہ وتعالیٰ انسانوں کے مر جانے کے بعد انھیں دوبارہ زندہ کرنے پر بھی قادر ہے۔ یہ واقعہ انتہائی اہمیت کا حامل ہے کیونکہ اس میں بنی اسرائیل کی ایمانی اور اخلاقی پستی کا بھی اندازہ لگایا جا سکتا ہے۔

پس منظر: حضرت محمد ﷺ جب ہجرت فرما کر مدینہ منورہ تشریف لائے تو یہ سورت نازل ہوئی۔ مدینہ منورہ میں اب جن لوگوں کو دعوت حق دی جا رہی تھی یہ لوگ مکہ مکرمہ کے لوگوں سے بالکل مختلف تھے۔ یہاں دعوت اسلام جس بنیاد سے دی جا رہی تھی اس کی ضروریات و تقاضے بھی مختلف تھے۔ ہجرت سے پہلے جب تک دعوت اسلام مکہ مکرمہ میں دی جاتی رہی تب خطاب بھی مشرکین عرب سے تھا جن کے لیے اسلام ایک نئی اور ایک انجانی آواز تھی۔ ہجرت کے بعد یہاں یہودیوں سے واسطہ پڑا جن کی بستیاں مدینہ منورہ کے ساتھ آباد تھیں۔ یہ لوگ توحید، رسالت اور آخرت و وحی کے قائل تھے۔ اس ضابطہ کو تسلیم کرتے تھے جو اللہ سبحانہ وتعالیٰ نے حضرت موسیٰ علیہ السلام پر نازل کیا تھا، اور اصولی طور پر اگر دیکھا جائے تو ان کا دین بھی وہی تھا جس کی تعلیم ہمارے نبی ﷺ دے رہے تھے۔ لیکن صدیوں کے مسلسل انحطاط نے ان کو اصل دین سے بہت دور کر دیا تھا۔ ان کے عقائد میں اب بہت سی غیر اسلامی ملاوٹ ہو چکی تھی جس کو وہ حقیقی دین سمجھتے تھے۔ جن کی تورات میں کوئی وضاحت نہ تھی۔ ان کی عملی زندگی میں کافی ایسے عوامل شامل تھے جو اب رسم ورواج کی مکمل شکل اختیار کر چکے تھے۔ جو نہ تو اصل دین تھا اور نہ ہی تورات میں ان کے بارے میں کوئی دلیل موجود تھی۔ خود تورات کو انھوں نے انسانی کلام کے اندر خلط ملط کر دیا تھا۔ دین کی اصل روح ان سے نکل چکی تھی اور وہ ظاہری مذہبیت کا ایک ڈھونگ رچا رہے تھے۔ اس کے علاوہ ان علماء، مشائخ، اور ان کے سرداران قوم اور سب کی سب عوام، سب کے اعتقادی، اخلاقی اور عملی پہلو ہر لحاظ سے بگاڑ کا شکار ہو چکے تھے۔ اور یہ بگاڑ ان کے اندر اس حد تک گھر کر چکا تھا کہ وہ کسی اصلاح کو ماننے کیلئے کسی طریقے سے بھی قطعاً تیار نہ تھے۔

نبی کریم ﷺ کی دعوت حق: جب نبی آخرالزماں ﷺ مدینہ منورہ پہنچے تو آپ ﷺ کو اللہ تعالیٰ نے ہدایت فرمائی کہ ان کو ان کے حقیقی دین کی طرف بلائیں، سورۃ البقرۃ کے ابتدائی، پندرہ سے سولہ رکوعات اسی دعوت پر مشتمل ہیں۔ ان رکوعات میں یہود کی تاریخ اور اس کے ساتھ ان کی اخلاقی و مذہبی پستی پر روشنی ڈالی گئی ہے جس میں ان کے بگڑے ہوئے مذہب و اخلاق کی نمایاں خصوصیات کے مقابلہ میں دین حقیقی کے تمام روشن پہلوؤں پر بات کی گئی ہے۔

ریاست اسلامی کی بنیاد: مکہ میں معاملہ تو صرف دین کی تبلیغ اور دین کے قبول کرنے والوں کو اخلاقی تربیت دینے کی حد تک محدود تھا۔ مگر جب آپ ﷺ مدینہ منورہ ہجرت کر کے تشریف لائے تو عرب کے مختلف قبائل کے لوگ بھی اسلام کو قبول کر چکے تھے۔ نبی ﷺ پر ایمان لانے والے ہر طرف سے سمٹ کر ایک جگہ جمع ہونے لگے اور انصار کی مدد سے ایک چھوٹی سی اسلامی ریاست کی بنیاد ڈالی گئی۔ تو اللہ سبحانہ وتعالیٰ نے تمدن، معاشرت، قانون اور سیاست کے مسائل کے متعلق بھی اصولی ہدایات فرمانا شروع کر دیں تھیں جن میں بتایا گیا کہ اسلام کی اساس پر یہ نیا نظام زندگی کس طرح تعمیر کیا جائے۔

منافقین کا ظہور: دعوت اسلامی کے اس مرحلہ میں ایک اور عنصر بھی شامل ہونا شروع ہو گیا تھا۔ اور یہ عنصر منافقین کا تھا۔ سورۃ البقرۃ کے نزول میں منافقین کے ظہور کی محض ابتداء تھی اس لیے اللہ سبحانہ وتعالیٰ نے ان کی طرف اجمالی اشارات کو فرمایا ہے۔ اس کے بعد ان کی جتنی بھی حرکات ظاہر ہوتی گئیں اس قدر باقی سورتوں میں تفصیل کے ساتھ ہر قسم کے منافقین کی نوعیت کے اعتبار کے ساتھ الگ الگ ہدایات بھی فرمائی گئی ہیں۔

شان نزول: نبی محتشم ﷺ جب مکہ مکرمہ سے ہجرت فرما کر مدینہ منورہ تشریف لا چکے تھے تو یہ سورت نازل ہوئی۔ اب مدینہ منورہ میں جن لوگوں کو اللہ سبحانہ وتعالیٰ کے دین کی دعوت دی جارہی تھی یہ مکہ مکرمہ کے لوگوں سے ہر لحاظ سے مختلف تھے۔ مکہ مکرمہ میں آپ ﷺ کا واسطہ مشرکین مکہ سے تھا مگر مدینہ منورہ میں مشرکین کے علاوہ یہودی اور منافقین بھی تھے۔ لہٰذا سورۃ البقرۃ میں نئے دور کے تقاضوں کے لحاظ سے احکامات خداوندی کا نزول ہوا۔ جس وجہ سے اس سورت کے موضوعات و مضامین کا مکی سورتوں سے فرق واضح و نمایاں ہے۔