بارگاہ رسالت میں حاضری کے آداب: سورۃ الحجرات میں نبی کریم صلی اللہ علیہ وسلم کے سامنے حاضری کے آداب کے بیان کا ذکر ہے کہ۔۔۔

1): جب نبی کریمؐ کوئی بات فرمائیں تو آپؐ کی پیروی اور اتباع کی جائے۔ 2): حضور صلی اللہ علیہ وسلم کے حکم کے مقابلے میں کوئی مشورہ پیش نہ کیا جائے۔

3): آپ صلی اللہ علیہ وآلہ وسلم کے فیصلے سے پہلے کوئی فیصلہ نہ کیا جائے۔ 4): نبی کریم صلی اللہ علیہ وسلم کی موجودگی میں آہستہ آواز میں بات کی جائے۔

5): جب آپ صلی اللہ علیہ وسلم آرام فرما رہے ہوں تو باہر سے آواز نہ دی جائے بلکہ آپ صلی اللہ علیہ وسلم کے باہر تشریف لانے کا انتظار کیا جائے۔

ان تمام آداب کی بجا آوری پر جنت اور اجر عظیم کا وعدہ کیا گیا ہے جبکہ کوتاہی کی صورت میں اعمال ضائع ہونے کی وعید سنائی گئی ہے۔

تحقیق کا حکم: سورۃ الحجرات میں معاشرتی آداب کی تعلیم دی گئی ہے کہ سنی سنائی بات پر اس وقت تک یقین نہ کیا جائے جب تک پوری تحقیق اور تسلی نہ کر لی جائے۔ اگر کسی شخص قوم یا گروہ کے خلاف کوئی اطلاع ملے تو غور سے دیکھنا چاہیے کہ خبر ملنے کا ذریعہ قابل اعتماد ہے یا نہیں۔ قابل اعتماد نہ ہو تو کاروائی کرنے سے پہلے تحقیق کر لینی چاہیے کہ خبر صحیح ہے یا نہیں۔

اسلامی اخوت کا بیان: مسلمانوں کو آپس میں ایک دوسرے کا بھائی قرار دیا گیا ہے اور ہمیشہ محبت سے رہنے کی تلقین کی گئی ہے۔ اگر دو مسلمان بھائی کسی معاملہ پر آپس میں جھگڑ پڑیں تو ان کے درمیان صلح کروانی چاہیے اور ہمیشہ انصاف کے ساتھ فیصلہ کرنا چاہیے۔

معاشرتی برائیوں سے بچنے کی تلقین: سورۃ الحجرات میں ان معاشرتی برائیوں سے بچنے کی تلقین کی گئی ہے جو اجتماعی زندگی میں فساد کا سبب بنتی ہیں اور جن کی وجہ سے آپس کے تعلقات خراب ہوتے ہیں۔ اس حوالے سے سورۃ الحجرات میں درج ذیل ہدایات دی گئی ہیں۔۔۔

1): ایک دوسرے کا مذاق نہ اڑاؤ۔ 2): ایک دوسرے کو طعنہ نہ دو۔ 3): ایک دوسرے کو غلط نام سے نہ پکارو۔ 4): بدگمانی، غیبت اور دوسروں کی جاسوسی نہ کرو

معیار فضیلت: سورۃ الحجرات میں یہ واضح کیا گیا ہے کہ اللہ تعالیٰ کے ہاں فضیلت کا معیار صرف اور صرف تقویٰ ہے۔ کسی کو یہ حق حاصل نہیں کہ وہ دوسرے کو خود سے کم تر سمجھے۔ اللہ تعالیٰ نے تمام قومی اور نسلی امتیازات پر ضرب لگا کر اس برائی کی جڑ کاٹ دی ہے۔ اللہ تعالیٰ کے ہاں فضیلت کا معیار صرف اور صرف تقویٰ ہے۔ سو تمام انسان حضرت آدم علیہ السلام کی اولاد ہیں۔ انسان کا قوموں اور قبیلوں میں تقسیم ہونا تعارف کے لیے ہے تفاخر کے لیے نہیں ہے۔

ایمان کی حقیقت کا بیان: سورت کے آخر میں بتایا گیا ہے کہ اصل چیز ایمان کا زبانی دعویٰ نہیں بلکہ سچے دل سے اللہ تعالیٰ اور اس کے رسول کو ماننا عملا فرماں بردار بن کر رہنا اور خلوص کے ساتھ اپنی جان اور مال اللہ تعالیٰ کے راستے میں قربان کرنا ہے۔